Vantaxes xerais da compostaxe doméstica

A compostaxe doméstica ten grandes vantaxes sobre o medio ambiente e a economía e a sociedade

• Desde o punto de vista ambiental, porque se logra depositar menos refugallos no contedor verde convencional, propiciando unha redución da frecuencia de recollida por parte dos servizos municipais e, por tanto, das emisións de CO₂ derivadas do transporte.
• Ademais, como xa vimos, a aplicación do compost achega unha serie de beneficios en forma de nutrientes ao solo, mellorando as propiedades físicas, químicas e biolóxicas do mesmo.
• Desde a dimensión económica, porque, tendo en conta que a materia orgánica representa en torno ao 40 por cento da composición media da nosa bolsa de lixo, se se evita o seu depósito no contedor xenérico, verase reducido o importe da factura que os concellos deben pagar a Sogama.
• E desde a perspectiva social, porque se trata de recuperar unha tradición en Galicia, como é a separación dos restos orgánicos para alimento do gando e/ou elaboración de compost, posibilitando que os habitantes do rural reduzan os desprazamentos que necesariamente deben facer aos contedores, polo xeral moi distanciados das vivendas debido á alta dispersión da poboación.
• Debemos ter en conta que a maior parte dos residuos que xeramos nos nosos fogares son residuos biodegradables (supón o 42% do total), polo que dispoñemos dunha cantidade de materia orgánica significativa da que podemos obter beneficios se sabemos aproveitala.